Yangiliklar

“UzAuto Motors” AJda dual ta’lim imkoniyatlari
2023-06-15 19:30:59 Yangiliklar
 
                          Yangiliklar

Bugungi kun holatiga ko’ra “UzAuto Motors” AJda 14 000 nafardan ortiq xodim faoliyat olib bormoqda. Shundan 6 000 nafardan ortig'ini yoshlar tashkil etadi. Kadrlar saviyasi har qanday tashkilotning istiqbolini belgilab berishini inobatga olib, korxona bilimli, malakali, jahon standartlari talablariga javob beradigan mutaxassislar yetishtirish hamda ularning malakasini oshirish uchun muntazam ravishda sarmoya kiritib boradi. O’z navbatida, 2022-2023 o’quv yilida  5 yil ish stajiga ega bo’lgan 140 nafardan ortiq xodimlar korxona tavsiyanomasiga asosan o'qishga qabul qilinib, kontrakt to’lovlari qoplab berildi.

 

Qolaversa, bugungi kunga kelib O'zbekiston avtomobilsozlik sohasida faoliyat yuritayotgan 30 ming nafardan ortiq xodimdan 70 foizi malaka oshirishga muhtoj. Bundan tashqari, sohaga har yili 1 000 - 1 500 yangi mutaxassislar talab qilinadi. Ushbu muammoni nafaqat avtomobilsozlik, balki boshqa ishlab chiqarish tarmoqlarida ham hal qilish uchun “Uzavtosanoat” AJ tashabbusi bilan Italiyaning Turin politexnika universiteti bilan hamkorlikda Andijon shahrida “Industry 4.0” ilg‘or texnologiyalariga yo‘naltirilgan o‘quv markazini tashkil etish bo‘yicha kelishuvga erishildi. Xorijiy mutaxassislarga sarflanadigan mablag’larni tejash va professional muhandis texnik xodimlarga bo’lgan ehtiyojlarni yo’qotish, kadrlar zaxirasini yaratish maqsadida ushbu ta’lim tizimi tashkil etildi.

Kadrlarning amaliy tayyorgarlik darajasini yangi bosqichga olib chiqadigan ishlab chiqarish va o’quv jarayonlarining to’liq sinergiyasi dual ta’lim shakliga ko’ra 2022-2023-o'quv yilidan boshlab korxona bo’linmalari tomonidan tavsiya etilgan 60 nafar bilimli yoshlar universitetda tahsil olish uchun chuqurlashtirilgan o’quv tayyorlov kurslariga jalb etildi. Shundan 51 nafar yosh va iqtidorli xodimlar Toshkent Turin politexnika universitetiga to’lov-shartnoma asosida o’qishga qabul qilindi.

Xodimni ushbu tizimda o’qitish uni bir necha yildan so’ng boshqaruv lavozimiga qo’yish imkoniyatini yaratishi kompaniya uchun strategik jihatdan foydali qadamdir. Kadrlar bilim saviyasi va raqobatbardoshligi iqtisodiy ishlab chiqarish va jamiyatning boshqa sohalari taraqqiyoti va raqobatbardoshligining asosidir. Boshlagan har bir ishimizdagi sifat va samara aynan shu masala bilan chambarchas bogʻliq.